「痴線咩？佢有老婆㗎，同條陀地雞唔同。」令一個防疫衛兵講。佢地個個件防疫衫都一樣，無號碼，無標誌，唔知佢地點分邊個打邊個。「喂，你去公廁洗下啲血跡先好返居住點，今日嘅事如果有第四個人知，你就等我黎貼你逃走標誌啦。」楊立鳴唔敢多講，著返衫就沿住寧波街去白加士街公廁沖涼。
多日無人清理嘅公廁臭氣薰天，樓梯上面有唔少血跡，楊立鳴唔敢想像呢度發生過咩嘢事，直接衝入廁所。冰凍嘅水喉水，緩緩沖走楊立鳴身上嘅血跡，沖唔走心中嘅陰影。楊立鳴只係個普通嘅雞蟲，入黎隔離區之後多次見到逃走唔成功嘅屍體，心理質素已經強烈咗好多，不過一個女人喺自己射精一刻被打爆頭，四濺嘅血跡直接彈喺自己皮膚身上嘅觸感，楊立鳴感到自己可能永遠都唔再扯得起。
就黎夠鐘，防疫衛兵嘅警告喺心底響起，楊立鳴壓下心底嘅慌亂，起程返去上海街113號。「你，點解會喺上面落黎？係咪想走？」三個防疫衛兵截停楊立鳴。「唔…唔係呀，頭先個SIR…我急屎，急屎。」，支支吾吾只想儘快返去居住點。「急屎？」防疫衛兵上下打量楊立鳴，其他路過嘅居民都唔敢望，全部快步離開。楊立鳴覺得自己真係好蠢，如果當初好似佢地咁，對不公義視而不見，就唔會落到而家咁嘅田地。楊立鳴唔敢講頭先發生嘅事
「你本身做咩㗎，」防疫衛兵出乎意料地溫和，「係俾人捉入黎定點？」
「我本來係攝影師，係因為入黎食野而留低。」楊立鳴答。
「攝影師？」三個防疫衛兵互相望一望，突然兩個防疫衛兵一人一邊捉住楊立鳴雙手，拖住佢向佐敦道方向行。一個衛兵喺佢耳邊講：「唔好叫，唔好反抗，反抗就當你逃走。」
去到附近嘅麻雀館，早早封館嘅麻雀館大門打開，防疫衛兵俐落咁拖住楊立鳴入去，馬上有人鎖上麻雀館大門，一切好似無發生過一樣。
有人扶起目定口呆嘅楊立鳴，帶住佢喺一片漆黑嘅麻雀館曲曲折折行，「小心梯級，呢度係扶手。」手機光芒亮起，照住一張滿臉疲憊嘅成熟臉孔同一條陡峭向下嘅樓梯，身上嘅防疫裝仲未完全除低。
樓梯下係一個狹小嘅房間，一面牆上面滿布屏幕，屏幕前面係個後生仔，戴住副LV眼鏡，聚精會神咁望實每一個MON。牆邊嗰麻雀檯旁，一男一女起身迎接，幫手除低防疫衛兵身上嘅防護衣物。睇落年紀最大嘅防疫衛兵同楊立鳴講：「唔駛驚，你要驚嘅唔係我地，我地係消防，唔會亂咁殺人嘅。」楊立鳴仲未喺震驚中恢復，又要迎接更曲折嘅消息，「我想你幫我地做一件事。」
Search